Amiantoaren eraginpean egoteagatik hildako langile baten alargunari %40ko errekargua ordaintzera kondenatu dute Fagor Ederlan Tafalla

2022/10/10

Iruñako Lan Arloko 2. zenbakiko Epaitegiak 22.09.28an emandako epaiak frogatutzat jotzen du hildakoak amianto-zirrindolak manipulatu zituela babes-baliabiderik gabe, ingurumen-neurketarik egin gabe eta arropa garbitzeko protokolo espezifikorik gabe. Ebazpen judizial horrek frogatutzat jo du, halaber, 2004. urtera arte ez zela egin laneko arriskuen ebaluaziorik. Hori dela eta, Lan Arloko Epaitegiak ezetsi egin du Fagor Ederlan Tafalla S. K. enpresak aurkeztutako demanda, eta, ondorioz, gizarte-segurantzako prestazioak %40 handitzera kondenatu du enpresa, segurtasun-neurririk hartu ez zuelako.

Bidelagun Fundazioa, ELAk prekarietatearen eta lan-ezbeharren aurka modu eraginkorragoan eta espezializatuagoan borrokatzeko sortutako erakundea da. Bidelagun Fundazioak gogoratu nahi dugu Fagor Ederlan Tafalla, S. K. kondenatzen duen epai berri hau bigarren epaia dela, amiantoarekiko lan-esposizioan segurtasun-neurriak ez betetzeagatik.

Horregatik, prozesu hau eraman duten Bidelagun Fundazioko zerbitzu juridikoek, ulertezintzat jotzen dute enpresak bere erantzukizun nabarmena ukatzea eta hildakoen alargunak epaitegira joatea behartzea, horrek familiei dakarkien birbiktimizazioarekin.

Ildo horretan, ELAk eta Bidelagun Fundazioak erantzukizunez eta enpatiaz jokatzeko eskatu diete enpresei, eta bide judiziala beharrik gabe luzatzeari uko egiteko behingoz, bide horrek eragindako pertsonen sufrimendua areagotzeko baino ez baitu balio. Era berean, eta etorkizunerako Amiantoaren Biktimentzako Konpentsazio Funtsa Legebiltzarrean izapidetzen ari den testuinguru honetan, bi erakundeek langile klasearen osasunerako eskubidea modu eraginkorrean bermatzeko behar beste baliabide esleitzeko eskatzen diete erakunde publikoei, eta berretsi egiten dute lantokietatik produktu kantzerigenoak ezabatzearen alde borrakatzeko konpromisoa.